Metu planā

2022-āsēs bova plans paruodītė žemaitems bėndrėnės rašības a kėtuokė varijanta rēkalingoma kāp ėšlėkėmou. Metu pradiuo prasidiejės maskuoliu isėveržėms i svetėma žemė nukreipė mona mėslės ė nabova spieka kažkon darītė, bet kažkėik pavīka pakušintė, kon nuoriejau.

Pėrmāsis plans bova sopažindintė prietelius so bėndrėnė rašība, katron pruobėjau paskutinius 12 metu. Šėtam pruojektou palaikītuoju naatradau ė sorašės idiejės nusprėndiau papruobītė kėtāp.

Ka jau pėrmuojė pruojekta ruodbalsės pasėruodė vėsīms dėdlē majednės ta nusprėndiau bėndrėnė rašība parteiktė esamuoms parėnkont populēriausi varijanta. Gavuos šiuoks tuoks dounininku tarmies kratėnīs, dūnininkā lėka nurašītė…

Pruoblema pasėruodė tamė, ka patiuos bėndrėnės rašības/kalbuos puoreikis ėšlėikt mėnks. Daugis žemaitiu žemaitėška rašliava mata tik kāp špuosa, kėts dalīks garsē paskelbta idiejė „rašītė tāp kāp šneki“ sokūrė kuožna žmuogaus naklaidingoma: ka ė kāp ožrašīsi – būs teisingā. Vuo jė pruobiji ont kėik paruodītė vėina a kėta kliauza, ta būni pasmerkts kāp dėdliausis ėšsėšuokielis.

Veiziedams i ėšsėkeltus planus ė kas pavīka, tėnk apgailestautė ė pripažintė, ka nieka napavīka. Vėsė ožvestė pruojektā so vertėmās i žemaitiu kalba bėngies ont nagaliejėma ožrašītė „tāp“, pats bėndrėnės rašības pruojekts kāp ė bėngts, ale pasėtarnaus tik idiejuoms kāp tuoliaus darītė. Daugis strateginiu mėsliu kon darītė so kalba lėka naėšgėrstas.

Kėtė metā… Nažėnau a bie ūkatas dā dėrbtė kažkon. Dā ožbėngso klausimīna aple žemaitiu kalbuos īpatībės, ka ėšlėktom kāp materėjuols. Rast dā papruobīso itrauktė žemaitiu i līkavėma tarptautėnė sistema, ale nalabā matau prasmies, nes pargoldīmā vės tėik būs nagalėmė. Kėtkon darīso, jė pakvėis ė matīso prasmies.

Žemaitėškā rašīso ė tuoliaus – tas ī mona identėteta vėina ėš pamūrėnku. Rašīso kāp ė vėsė - tik savėi.

Kėtās metās žemaitems linko veizietė platiau, nabūtė naklīstontīms ė rastė spieka sotarėmams. Taikuos ❤