Jė Facebook būtom vagol dūnèninkus

A vėsė žemaitē būtom kontėnė, jė Facebook būtom vagol dūnèninkus? Žmuonis nuoriejė mòmis somaltė so žemiems.

Tarmies apklausa Facebook'ů

„Žemaitėškuo rašlevuo“ bova atlėkta apklausa so pruovuokůnonťio klausėmo „Kuokė tarmė pasirinktė pargoldītė Facebook?“. Kodie pruovuokůnòntis? Rēktom būtė dėdelio egoėsto, ka primestė vėsīms sava tarmė bȧ juokė apsitarėma prīš ton̄. Karto rēk soprastė, ka vënuos tarmies/puotarmės/šnektuos ėškelėms kėtas pastūms i ontra plana.

Bieda ta, ka esont nuorů torietė tuokės pruogramas kap Facebook ėšverstas i žemaiťiu kalba, sprėndėms tor būtė atlėkts. A pasirinkė̄ vëna puotarmė (tėksliau net šnektėkė, nes tor būtė ků mažiau skėrtingu skvarmu), a „sokonstrůtė“ ėš keliū vëna, a tik bėndrėnė rašība nauduotė, bet kažkuoks sprėndėms ėš tū tor būtė prijimts. Ė geriau būtom, ka tas nȧbūtom nukelta i nȧžėnuoma ateitė, nes ků vieliau, tů sunkiau būs: pargoldīms nie šarps rēkals, jaunėma kalba vės daugiau īr aplietovinta.

Telšèškiu i/u

Par apklausa pasimatė ont këk žmuonis nauduo telšèškiu tarmė. Anuos vëna pagrindėniu īpatībiu ī kaitaliuojėms i/ė ėr u/o vagol galūnė. Diel dėdelė skaitlė nauduotoju rēk, ka ė tas būtom atvaizdůta bèndrènie rašībuo.

Tas gal būtė itraukos dā papėlduomas ruodbalsės: è ėr ò, katruom būtom žīmėmas i ėr u telšèškiu, vuo kretingėškē torietom tuoliau skaitītė kap ė ėr o. Pri tuo patė kėlė̄ ėš nuosėniu torietom atėtinkamā atsivaizdůtė: žò̄sis (lt. žąsys) ė to skè̄sti (lt. tu skęsti).

Kāp rašītė Lietova?

Facebook’ė „Žemaitėškuo rašliavuo“ bova atlėkta apklausa kāp tor būtė rašuoms Lietovuos vards. Žiaurē gers bova patiemījėms, ka „lëtovā“ – rakonds sūriů spaustė (lëtė). Patis rašiem „Lëtova“, t.ī Lėitova arba Lītova, jė palē dūnėninkus. Nu dabā rašīsȧm „Lietova“.

Dvėbalsē žemaiťiu kalbuo

Kuokë ī dvėbalsē žemaiťiu kalbuo?

• AI - kaist, laikītė, paišielis
• AU - mautė, klausėms, gauda
• EI - keistė, peilis, seilė
• IE - šieps, miests, bieda
• OI - kloika, poikē, loinīs
• UO - žuodis, bruolis, ruodītė

Tarptautėniūs žuoďius:

• EU - Euruopa, eufuorėjė
• OU - šou (rėngėnīs)

Dounėninkā dā tor OU, ĖI, bet dūnėninkā tar Ū, Ī. Bėndrėnie rašībuo siūluoma rašītė Ů, Ë:

• Ë - žëds, pëns, dëna
• Ů - důna, šů, důtė

Bet rašont paprastuo rašībuo dounėninkā rašīs: žėids, pėins, dėina, douna, šou, doutė/douti/dout’, vuo dūnėninkā: žīds, pīns, dīna, dūna, šū, dūtė/dūti/dūt'

Žemaiťiu sorašīms 2021

Paskelbė oficēlē sorašīma důmenis. Šėts sorašīms bova vīkduoms apklausuos skvarmuo, ta lëkt daug vëtas interpretacėjē.

Praďiuo, ka prietelē patis toriejė jungtës pri kompioterė ė taisītė sava tautībė. Nȧ vėsi ton̄ imeigė, bet ėš kėtuos posės, ta žemaitē nuoriejė būtė atsižīmiejė̄, ta tas gal konpensůtė.

Apklausti bova 171 tūkst. žmuoniū.

Ėš anū nuruodė tautībės pataisīmus 681 prietelis, katrë nuruodė tǡp:

• žemaitē – 579
• žemgalē – 56
• koršē – 19
• prūsā – 10
• aukštaitē – 8
• dzūkā – 5
• sovalkietē – 4

Ėš vėsa bova sorašīts 2810761 gīventuos.

Žemaitē paviedè i cėguonus

Ků žemaitē paviedi (lt. panašūs) i ruomus, mūsa vadėnamus cėguonus? Veiziejau „Kalbuos klobs“ laidalė api anus ė tėn tevernuojė kuokius klapatus anë tor nuoriedami rašītė sava kalbuo. Ruomā Lëtovuo tǡp pat nȧtor bėndrėnės rašuomuosės kalbuos. Ī net dvė galȧm sakītė skėrtingė kalbė, dā gīvs gals tarmėkiu. Tǡp pat muokīkluosė nie vākā muokami anū kalbuos (Vėngrėjuo ruomu kalba diestuoma net universėtetė).

Šindënėnie Lëtovuo ruomu šarpē mažie – anë emėgrůn, vuo lėkė̄ rosie. Anū kalbuo daugie rosėzmu. Par gīventuoju sorašīma ruomās užsirašė api 2000, vuo muokonťiu sava gimta kalba api tūkstonti.

Nȧfėksouta kalba

Veizont ėš istuorėjės posės, ta kuol kalba nȧbūs fėksůta, tuol vīks anuos kėtėms. Žemaiťiu kalba tik arties pri lëtoviu. Kodie rašība fuonetėnė bluoga šindënā? Jimkȧm, ka ė smolkės tarmelės, katruos kāp ė „keravuojamas“ so tuokio atskėro rašīmo, ale nesont daug tekstu anuo nie ana augėnama, nie fėksůnama ė praded niveliůtës. Gerā, jė dā so kėta tarmė žemaitėška, ale tonkiau būn, ka paprasťiau pasijimtė „standartėnė“ kalba, katruo nȧbie juokiū klausėmu ė tësiuog žėnā kāp rašītė (a pasakītė) taisėklingā. Tǡp pamėslėjos, ta naujuovės nie juokės kliauzas, nes… tǡp šnek dabā nie če kuo graibstītës arkajėzmu, gė XXI omžios.