+++
date = '2021-11-17'
draft = false
categories = ['pamėslėjėmā']
title = 'Nȧfėksouta kalba'
+++

Veizont ėš istuorėjės posės, ta kuol kalba nȧbūs fėksůta, tuol vīks anuos kėtėms. Žemaiťiu kalba tik arties pri lëtoviu. Kodie rašība fuonetėnė bluoga šindënā? Jimkȧm, ka ė smolkės tarmelės, katruos kāp ė „keravuojamas“ so tuokio atskėro rašīmo, ale nesont daug tekstu anuo nie  ana augėnama, nie fėksůnama ė praded niveliůtës. Gerā, jė dā so kėta tarmė žemaitėška, ale tonkiau būn, ka paprasťiau pasijimtė „standartėnė“ kalba, katruo nȧbie juokiū klausėmu ė tësiuog žėnā kāp rašītė (a pasakītė) taisėklingā. Tǡp pamėslėjos, ta naujuovės nie juokės kliauzas, nes... tǡp šnek dabā nie če kuo graibstītës arkajėzmu, gė XXI omžios.

Nuoront, ka kalbėnė sėstema ėšlėktom, rēk anon̄ pateiktė tǡp, ka būtom galėmībė patėkrintė a teisingā užrašīts (arba pasakīts) vëns a kėts žuodielis. Paprasťiausis sakėnielis žemaitėškā, dailē užrašīts konkreťiuo tarmie jau kor luobīna ėš katruo gal darītė žuodīnus a rašītė kalbrieda muokėnėmůsi. Tik kon̄ darītė, ka Žemaiťiūs ī bėnt jau 6 stombiesnės tarmės ė tektom anas vėsas atskėrā aprašėnietė. Jė žemaiťiu ī kuoks posė mėlėjuona, ta padalėnos ėš šešiū - audėtuorėjė, katrā tas torietom rūpietė, tėrpst smarkē. Lëkt vëns kels - apjungtė.

Kāp apjungtė? Jė žemaitē nȧbūtom tuokë užsispīrė̄ ė nȧgintom aklā sava kėtuonėška ėštarėma (ka ė naujuovė sava kalbuo, katra arda žemaiťiu kalba), ta sotartomiem. Rēktom šarpē ataktė, ka pu vëna mȧs nugalůsma sava kalba.

A bėndrėnė kalba kortomiem palē kuokė vëna tarmė, a somaišītomiem vėsas i vëna pasirinkdami labiausē paplėtosės skvarmas (arba archajėškiausės), a praďiuo tik bėndra rašība prijimtomiem, ka keravuotė kuožna žemaiťiu dėdliesnė tarmė - če nie tǡp svarbē. Svarbiau ī pradietė kažkon̄ darītė, kuol žemaiťiu kalba nȧatgolė i muokslėnės disertacėjės api tuokė bovosė kalba, katra ėšninka laika verpetūs.